27.09.2024-cü il tarixdə Azərbaycan Əmək və Sosial Münasibətlər Akademiyasının  bir qrup əməkdaşı və tələbələri Vətən müharibəsi şəhidi, Maliyyə-iqtisad fakültəsinin məzunu Aqşin Novruzovun məzarını ziyarət ediblər.

Aqşin Novruzovun müəllimləri onun Vətən torpağı uğrunda qəhrəmancasına vuruşduğunu qeyd ediblər. Təhsil aldığı müddətdə nümunəvi tələbə kimi seçilən Aqşin Novruzovun müəllimləri və tələbə yoldaşlarının qəlbində daim yaşayacağı vurğulanıb.

Qeyd edək ki, Aqşin Novruzov 2020-ci ilin yayında həqiqi hərbi xidmətə çağırılıb, 2-ci Qarabağ müharibəsində iştirak edib. Döyüşlərin əvvəlində ayağından yaralanıb, müalicə olunduqdan sonra yenidən ön cəbhəyə yollanıb. Topçu olaraq briqadası ilə birlikdə döyüşlər zamanı 2 düşmən tankını məhv edib. 13 oktyabr 2020-ci ildə Kəlbəcər istiqamətində gedən döyüşlərdə qəhrəmancasına şəhid olub.

Azərbaycan Respublikasının Prezidenti İlham Əliyevin 15 dekabr 2020-ci il tarixli Sərəncamına əsasən “Vətən uğrunda”, 29 dekabr 2020-ci il tarixli Sərəncamına əsasən "Kəlbəcərin azad olunmasına görə" medalı və 30 dekabr 2020 -ci il tarixli Sərəncamına əsasən isə "Hərbi xidmətlərə görə" medalı ilə (ölümündən sonra) təltif edilib.