Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin ayırdığı qrant vəsaiti hesabına Əlilliyə Erkən Yardım “Portec Şəbəkəsi” İctimai Birliyi tərəfindən həyata keçirilən “Sosial işin keyfiyyətinin artırılması” layihəsi üzrə təlimlər yekunlaşmışdır.

Layihənin məqsədi ölkədə sosial iş üzrə təhsilin xüsusilə həssas qruplarla aparılan sosial iş sahəsində ixtisaslaşmanın keyfiyyətinin artırılması, bu sahədə yerli və beynəlxalq qanunvericiliklə yanaşı, təcrübənin öyrənilməsi və müxtəlif sferalarda sosial işin inkişafı üçün silsilə təlimlər vasitəsilə maarifləndirilmənin keçirilməsidir.

Təlimlər sosial iş sahəsində ixtisaslaşmış və təcrübəli mütəxəssislər tərəfindən keçirilmiş, iştirakçılara sosial işçinin bilməli olduğu vacib mövzular tədris olunmuşdur. Bununla yanaşı təlimlərdə qrup işləri, rollu oyunlar, psixoloji testlər, buzqıranlar tətbiq olunmuş, həmçinin real keyslər üzrə aparılan işlər, keys menecment, ilkin qiymətləndirmə, konsultasiya qaydaları mövzuları ətrafında müzakirələr aparılmışdır.

Layihə üzrə təlimlər təcrübəli mütəxəssis Günay İbrahimova tərəfindən icra olunmuşdur. Təlimlərə layihənin icrası üzrə tərəfdaş təşkilat qurum Sosial İş Məktəbinin rəhbəri Lamiyə Rzayeva- Əhmədli, UNİCEF Azərbaycanın “Sosial Xidmətlər və Uşaqların Müdafiəsi” sahəsi üzrə milli məsləhətçisi Elmir Valehli, Miqrasiya Siyasətinin İnkişafı üzrə Beynəlxalq Mərkəzin “Miqrant və Qaçqınların inteqrasiyası” üzrə milli məsləhətçisi Emin Mehdizadə qonaq olmuş, öz təcrübələrini və nəzəri məlumatları iştirakçılarla bölüşmüşdürlər.

Əlilliyə Erkən Yardım “Portec Şəbəkəsi” İctimai Birliyinin, eləcə də “Sosial işin keyfiyyətinin artırılması” layihəsinin rəhbəri Gülnarə Pənahova təlimlərdə iştirakçılara sahədə vacib hesab olunan tövsiyyələr vermişdir.

Təlimdə akademiyamızın Sosial iş fakültəsinin tələbələri Xadırova Aynur, Musayeva Natəvan, Əliyev Səbuhi, Qafarlı Zöhrə, Ağayeva Lamiyə, İsrafilova Fəridə, Abbasova Cəhanə, Məmmədli Nahidə, Tağızadə Kənan, Vəlizadə Şəhanə aktiv iştirak etdiklərinə görə sertifikatlarla təltif olunmuş və “Portec Şəbəkəsi” İctimai Birliyi tərəfindən Sosial iş fakültəsinin dekanı Sədaqət Məmmədovaya xüsusi təşəkkürnamə verilmişdir.