22 may 2023-cü il tarixdə kurs iştirakçıları «Kollektiv müqavilə - işçi ilə işəgötürənin maraqlarının müdafiəsinin əsas vasitəsi kimi», «Fərdi və kollektiv əmək mübahisələrinin həllində həmkarlar ittifaqlarının iştirakı” mövzuları üzrə praktiki situasiyaları həll etdilər. Dərsləri tədris etmək üçün AR Əmək və Əhalinin Sosial Müdafiəsi Nazirliyinin “Əmək siyasəti” şöbəsinin baş məsləhətçisi Fəridə Hacıyeva dəvət olunmuşdu.

Müasir Psixologiya Mərkəzinin psixoloqu Könul Qocayeva planlaşdırma və vaxtın idarə edilməsi, onun strateji planlaşdırılması haqqında əsas psixoloji aspektləri açıqladı.

        “ Əmək fəaliyyəti haqqında məlumatların elektron formada formalaşdırılması və saxlanılmasının xüsusiyyətləri” mövzusu  xüsusi maraq doğurdu. AR Əmək və Əhalinin Sosial Müdafiə Nazirliyinin tabeliyində Dövlət Məşğulluq Agentliyinin “Əmək bazarının təhlili” şöbəsinin baş mütəxəssisi İsmayıl Kərimov  bugünkü əmək bazarında vəziyyəti təhlil etdi.

          23 may 2023-cü il tarixdə Dövlət  İdarələri və İçtimai Xidmət işçiləri Həmkarlar   İttifaqı Respublika Komitəsinin sədri Hikmət Osmanov “Əmək qanunvericiliyinə əməl olunmasına və işçilərin əmək hüquqlarının müdafiəsində  həmkarlar ittifaqı nəzarəti” mövzusu ilə bağlı kurs iştirakçıları qarşısında çıxış etdi. Dərs müzakirə formasında keçirildi və Hikmət müəllim ətraflı suallara cavab verdi, çünki həmkarlar ittifaqı təşkilatının fəaliyyətində bu mühüm istiqamətdir.

“Təşkilatın korporativ mədəniyyəti: anlayışı, mahiyyəti və tətbiqi” mövzusunda AR Əmək və Əhalinin Sosial Müdafiəsi Nazirliyinin tabeliyində Əmək Bazarı və Sosial Müdafiə Məsələləri üzrə Milli Observatoriyanın Təlim şöbəsinin müdiri Təyyar Mustafayev təşkilatın korporativ mədəniyyəti haqqında peşəkarcasına təqdimatı ilə interaktiv metodlardan istifadə edərək qrup ilə birlikdə bu mövzunu müzakirə etdi.

Dərs gününün sonunda həmkarlar ittifaqı işçiləri İbrahim Yusifoğlunun “O, günəş ömrüdü, sönməyəçəkdir” poemasının təqdimatında iştirak etdilər. Bu təqdimat Azərbaycan xalqının Ümummilli lideri Heydər Əliyevin 100 illik yubileyinə həsr olunmuşdur.

Tədbirdə açılışı “Taghiyev Operating Company” MMC HİK-in  sədri Abbasəli  Rüstəmli etdi. Sonra AMEA Nizami Gəncəvi ad. Ədəbiyyat İnstitutunun filologiya üzrə elmlər doktoru, professor Salida Şərifova çox peşəkarlıqla poemanın bugünkü əhəmiyyətindən, Heydər Əliyev şəxsiyyətinin respublikanın çiçəklənməsindəki rolunun poemada öz əksini tapmasından danışdı.

Bundan sonra bu poemanın necə ərsəyə gəldiyi barədə məlumat verən müəllif İbrahim Yusifoğlu çıxış etdi. Müəllif bəzi hissələri oxudu. Təqdimatda kurs iştirakçıları da çıxış edərək öz təəssüratlarını bölüşdülər. Təqdimatın sonunda kollektiv şəkil çəkdirildi. Görüş isti və yaddaqalan xatirələr şəraitində keçdi.