Dekabrın 12-də Azərbaycan Əmək və Sosial Münasibətlər Akademiyasında “Anım Günü” ilə əlaqədar tədbirlər keçirildi. Əvvəlcə tədbir iştirakçıları Ulu Öndərin əziz xatirəsini bir dəqiqəlik sükutla yad etdilər.

Tədbirdə Ulu öndər Heydər Əliyevin çoxşaxəli fəaliyyətindən, Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətlərindən, böyük xilaskarlıq missiyasından danışıldı, videoçarxlar nümayiş olundu.

Qeyd olundu ki, Ulu öndər Heydər Əliyevin Respublikamıza rəhbərlik etdiyi dövrlər möhtəşəm quruculuq və tərəqqi, davamlı və hərtərəfli inkişaf mərhələləri kimi şanlı tariximizin səhifələrinə qızıl hərflərlə yazılıb. XX əsrin 60-cı illərinin sonlarından başlayaraq 35 ilədək bir müddətdə ümummilli lider Heydər Əliyevin Azərbaycana rəhbərliyi ilə xalqımız ictimai-siyasi, sosial-iqtisadi və mədəni həyatın bütün sahələrində böyük dirçəlişə nail olub. Ölkə iqtisadiyyatının sürətli inkişaf strategiyasını gerçəkləşdirən Ulu Öndər Azərbaycanı tarixin sərt sınaqlarından inamla çıxarıb.

İstər Azərbaycan tarixində, istərsə də xalqın yaddaşında Heydər Əliyev müstəqil və suveren dövlətin simvolu, xarizmatik siyasət dahisi, cəsur insan və ən böyük vətəndaş kimi qalmışdır və qalacaq.

Eyni zamanda Maliyyə-İqtisad və Sosial iş fakültələrində Heydər Əliyevin 21 - ci anım günü münasibətilə dərslərdə Ulu öndərin həyat və yaradıcılığı haqqında tələbələrə məlumatlar verilmişdir.